Նոյեմբերի 6-ին եւ 7-ին ԱՄՆ-ում՝ Փասադենայի Արվեստի կենտրոնական պատկերասրահում կներկայացվի հայազգի ժամանակակից նկարիչ-քանդակագործ Էմիլ Գազազի անհատական ցուցահանդեսը, որը նախաձեռնել է Հայկական բարեգործական ընդհանուր միությունը՝ ի պատիվ արվեստում ունեցած մեծ նվաճումների: Ըստ tert.am-ի, ցուցահանդեսում ներկայացվելու են քանդակներ, գեղանկարներ, գծանկարներ ու խառը տեխնիկայով արված աշխատանքներ: «Մարդիկ ապրում են իրենց պարտադրված աշխարհում, ես ստեղծել եմ մի աշխարհ, որտեղ նախընտրում եմ ապրել»,- գրում է Էմիլ Գազազը, ում արվեստը, Հենրիկ Իգիթյանի բնորոշմամբ, «միաձուլում է արեւմտաեվրոպական եւ հայ միջնադարյան մշակույթների միտումները, անհամատեղելին միավորում է միանգամայն նոր հարթության մեջ»: Էմիլ Գազազը պարգեւատրվել է Լորենցո Մեդիչիի մեդալով եւ քանդակագործության ասպարեզում Լորենցո Մադիֆիկոյի բարձրագույն մրցանակով:
