Եթե տնտեսական ճգնաժամը երկար շարունակվի, ապա երկարաժամկետ միգրանտները կվերադառնան Հայաստան: Երեկվա ասուլիսում նման համոզմունք հայտնեց Միգրացիոն գործակալության պետ Գագիկ Եգանյանը՝ հավելելով, որ նման կանխատեսում արվել էր նաեւ անցյալ տարի, բայց այն չի արդարացել: Իրենց կանխատեսումները պարոն Եգանյանը հիմնավորեց նրանով, որ աշխատանքային միգրանտները հիմնականում ապրում են վարձով եւ աշխատանքը կորցնելու դեպքում չեն կարողանա վճարել բնակարանների վարձը եւ ստիպված կվերադառնան: Սակայն նրանք գերադասել են աշխատել ցածր վարձատրությամբ, բայց՝ հայրենիք չվերադառնալ:
Ներկայացնելով 2009-ի հունվար-սեպտեմբեր ամիսներին միգրացիայի պատկերը հանրապետությունում, պարոն Եգանյանը նշեց, որ այդ ժամանակահատվածում մեկնածների թիվը գերազանցել է ժամանածների թվին՝ 4500 մարդով, ինչը 27 հազարով պակաս է նախորդ տարվա ցուցանիշից:
Գ. Եգանյանը նշեց, որ այս տարի արտերկիր մեկնել է մոտ 30 հազար մարդ:
