Օրերս ՀՀ կառավարության որոշմամբ փոփոխություններ կատարվեց ՀՀ կառավարության 2004թ. ապրիլի 14-ի եւ 2008թ. նոյեմբերի 27-ի որոշումներում, որոնք վերաբերում են «Գնահատման եւ թեստավորման կենտրոնի» ու «Մասնագիտական կրթության որակի ապահովման ազգային կենտրոն» հիմնադրամի գործունեությանը: «Առավոտի» տեղեկություններով՝ կառավարության որոշմամբ մի շարք փոփոխությունների շարքում այս երկու կառույցները դուրս են բերվել ԿԳՆ-ի ենթակայությունից: ՀՀ վարչապետի խորհրդական Արամ Անանյանն էլ «Առավոտին» փոխանցեց ՀՀ կառավարության որոշումը, որով ամրագրված է, որ երկու կառույցները հանվեն ԿԳՆ-ի ենթակայությունից՝ դրանց պետական լիազոր մարմին ճանաչելով ՀՀ կառավարության աշխատակազմը: Իսկ որոշումն ունի հետեւյալ հիմնավորումը. «ԿԳՆ-ն իր կանոնադրության համաձայն իրականացնում է ոլորտի քաղաքականության մշակում եւ դրա իրականացման նկատմամբ վերահսկողություն: Կրթության բարեփոխումների արդյունավետության բարձրացման, կրթական համակարգի կենսունակության եւ զարգացման անհրաժեշտ մակարդակի ապահովման կարեւոր պայմաններից մեկը զսպումների եւ հակակշիռների մեխանիզմների ներդրումն ու կիրառումն է: Այս պայմանը ապահովելու համար առաջարկում ենք ՀՀ ԿԳՆ՝ ավարտական եւ միասնական քննությունների կազմակերպման եւ անցկացման, ընթացիկ գնահատման իրականացման, ինչպես նաեւ նախնական, միջին, բարձրագույն մասնագիտական կրթության հավատարմագրման գծով անհրաժեշտ փորձաքննության գործառույթներ իրականացնող կազմակերպությունների կառավարումն իրականացնող պետական լիազոր մարմին ճանաչել «ՀՀ կառավարության աշխատակազմ» պետական կառավարչական հիմնարկին»:
Հ. Գ. Նշենք նաեւ, որ համառ լուրեր են պտտվում, թե առաջիկայում ԳԹԿ տնօրենի՝ ամիսներ շարունակ թափուր մնացած պաշտոնում կնշանակվի ժամանակին ԿԳ նախարարի պաշտոնը զբաղեցնող Լեւոն Մկրտչյանը:
