ՏԱՔՍԻ ԾԱՌԱՅՈՒԹՅՈՒՆՆԵՐԸ ԳՈՐԾՈՒՄ ԵՆ ԱՊՕՐԻՆԻ

Դեռեւս այս տարվա ապրիլ ամսին, ճանապարհային ոստիկանության եւ տրանսպորտի ու կապի նախարարության տրանսպորտային տեսչության աշխատակիցները մայրաքաղաքի փողոցներում ցուցադրաբար միջոցառումներ էին կազմակերպում՝ իբրեւ թե առանց դեղին պետհամարանիշների երթեւեկող տաքսիներին բռնելու համար: Մի քանի անհատ տաքսու խեղճուկրակ վարորդների տուգանելուց, մի քանիսին էլ տուգանային հրապարակ տանելուց հետո, «օրենքի պահապանները» իրենց գործը համարեցին կատարված: Ու քանի որ վերահսկողները աչքաթող արեցին անօրինական աշխատող տաքսիներին, նրանց հնարամիտ տերերն էլ գտան օրենքը շրջանցելու ճանապարհը: Բազմաթիվ տաքսի ծառայությունների սեփականատերեր դեղին համարանիշներ հանեցին ընդամենը մի քանի մեքենաների համար, իսկ մյուսները մնացին սպիտակ պետհամարանիշներով եւ շարունակեցին աշխատել առաջվա նման անօրինական դաշտում: Ունենալով 30-40 ավտոմեքենա, տաքսի ծառայության տերերը հարկ են վճարում ընդամենը 4-5 մեքենայի համար: Ստացվում է, որ բոլոր նրանք, ովքեր միամտաբար մտան հարկային դաշտ՝ հայտնվեցին տուժողի կարգավիճակում: Նրանք մի քանի հարյուր հազար դրամ ծախսեցին՝ լիցենզիայի, դեղին համարանիշի, տաքսոմետրի, հաշվիչ սարքի եւ այլնի համար, սակայն աշխատում են նույն պայմաններով, ինչ՝ անօրինական եւ չլիցենզավորված տաքսիները: Դեռ մի բան էլ՝ վերջինները կարող են անհամեմատ մատչելի գներով ուղեւոր փոխադրել, քանի որ հարկային դաշտ մտնելու համար մեծ գումարներ չեն ծախսել:
Դժվար է պատկերացնել, որ տրանսպորտային տեսչության աշխատակիցները երբեւիցե չեն նկատել մայրաքաղաքի փողոցներում սպիտակ պետհամարանիշներով աջուձախ երթեւեկող տաքսիները: Պատճառաբանությունը, թե ոմանց ժամանակ է տրվել՝ լիցենզավորվելու համար, եւս անտրամաբանական է, քանի որ նույն տաքսի ծառայությունը լիցենզիան ձեռք է բերում միանգամից բոլոր մեքենաների համար: Այսինքն՝ 20 կամ 50 մեքենա լիցենզավորելու համար վճարվում է միեւնույն գումարը, այլ հարց է, թե քանի տաքսու վարորդ է գրանցվում որպես աշխատող եւ քանի մեքենայի համար են հարկային մուծումներ արվում:
Եթե իսկապես տեսչության աշխատակիցների աչքից վրիպել են օրինախախտ տաքսիները, ապա ընդամենը մի քանի րոպե շրջելով մայրաքաղաքի փողոցներում, «Առավոտի» տեսախցիկը ֆիքսեց նման տասնյակ մեքենաներ: «Մետաքս», «Ջավախք», «Արաբկիր», «Լի Աստղ», «Ապոլլո», «Իս-Իս», «Անգելինա», «Չաո», «Կիրզա», «Լեգեոն», «Կոնտինենտալ», «Անանի», «Վինի», «Լիդեր», «Max». ահա այն բազմաթիվ տաքսի ծառայություններից ընդամենը մի քանիսի անունները, որոնց մեքենաներից գոնե մի քանիսը, եթե ոչ բոլորը, աշխատում են անօրինական դաշտում: 
«Առավոտի» հետ զրույցում այս խնդրի մասին նշեց նաեւ «Վարորդ-ոստիկան համագործակցություն» հ/կ համանախագահ Գեւորգ Դոստուրյանը: Խնդրի առնչությամբ հ/կ-ն դիմել է հանրապետության նախագահին եւ վարչապետին:

ԳԱՅԱՆԵ ՍԱՀԱԿՅԱՆ