Երեկ Երեւանի քաղաքապետարանի «ՀայԱրտ» մշակութային կենտրոնում բացվեց ինքնատիպ մի ցուցահանդես, ներկայացնելով քույր եւ եղբայր՝ Հերիքնազ եւ Հրաչյա Գալստյանների 60-ից ավելի քանդակներն ու գեղանկարչական աշխատանքները: «Թեեւ յուրահատուկ ոճով եւ գեղարվեստաարտահայտչական միջոցներով տարբերվում են Գալստյանների ստեղծագործությունները, բայց ընդհանուր գիծը, որը միավորում է նրանց՝ ազգային գաղափարախոսությունն է,- նշեց «ՀայԱրտի» տնօրեն Ռիտա Շառոյանը՝ հավելելով,- անմիջապես մտածում ես. տեսնես մեր անցյալի ու պատմության ո՞ր հուշատետրից են սկիզբ առել «Սայլերգը», «Լուսաբացը», «Հորովելը», «Պանդուխտի երգը», «Կենաց ծառը», կոմիտասյան ո՞ր խաղերից, երգերից ու շարականներից են ծնվել… Ցուցահանդեսն իր բովանդակությամբ եւ գաղափարախոսությամբ նվիրումի տուրք է մեր անապական հպարտության՝ Կոմիտասի 140-ամյակին»:
Բացման հանդիսությանը առանձնահատուկ շունչ հաղորդեց «Միհր» թատրոնի՝ կոմիտասյան թեմաներով մանրապատումը, որի բեմադրիչն էր Հրաչյա Գալստյանի որդին՝ Ցոլակ Մլքե-Գալստյանը:
