![\"\"](\"https://www.aravot.am/2009/aravot_arm/October/30/p14.jpg\")
Մեծ Բրիտանիայի արտգործնախարար Դեւիդ Միլիբենդը Իրանի իշխանություններին կոչ է արել չեղյալ համարել Թեհրանում բրիտանական դեսպանատան աշխատակցի նկատմամբ կայացված դատավճիռը: «BBC»-ի փոխանցմամբ, դեսպանատան աշխատակից, Իրանի քաղաքացի Խոսեին Ռասսամը (նկարում) կալանավորվել է Իրանում տեղի ունեցած նախագահական ընտրություններին հաջորդած բողոքի զանգվածային ակցիաների ժամանակ եւ դատապարտվել է 4 տարվա ազատազրկման: Իրանի իշխանությունները Ռասսամին մեղադրել են լրտեսության եւ անկարգություններ սադրելու մեջ:
Մեծ Բրիտանիայի ԱԳ նախարար Միլիբենդն իր հրապարակած հայտարարության մեջ Ռասսամի նկատմամբ կայացված դատավճիռը որակել է որպես՝ «բացարձակապես անարդար»: Իրանի 44-ամյա քաղաքացին Թեհրանում բրիտանական դեսպանատանը զբաղեցրել է քաղաքական գլխավոր վերլուծաբանի պաշտոնը:
Միլիբենդն ասել է նաեւ, թե Ռասսամի դատավճռի վերանայման հարցը Իրանի ԱԳ նախարարի տեղակալի հետ զրույցում բարձրացրել է նաեւ Թեհրանում Մեծ Բրիտանիայի դեսպանը, իսկ Լոնդոնում Իրանի դեսպանը նույն հարցով հրավիրվել է Ֆորին գրասենյակ:
Հիշեցնենք, որ հունիսին Իրանում տեղի ունեցած զանգվածային անկարգությունների ժամանակ ձերբակալվել էին բրիտանական դեսպանատան տասնյակ աշխատակիցներ, բայց նրանցից միայն Խոսեին Ռասսամին էր մեղադրանք առաջադրվել:
