Ռուսաստանն ու Թուրքիան պայմանավորվել են Թուրքիայում, միջերկրածովյան Ջեյհան նավահանգստում նավթավերամշակման խոշոր գործարան կառուցել: Այդ մասին երեքշաբթի օրը հայտարարել է ՌԴ էներգետիկայի նախարար Սերգեյ Շմատկոն:
Ավելի վաղ, հոկտեմբերին՝ Ռուսաստանը հայտարարել էր նաեւ թուրքական Սամսուն-Ջեյհան նավթամուղի նախագծին մասնակցելու իր որոշման մասին: Բացի այդ, Ռուսաստանն ու Ղազախստանը պատրաստակամություն են հայտնել Սամսուն-Ջեյհան նավթամուղի համար նավթ մատակարարել: Հիշեցնենք, որ Թուրքիայի Սեւ եւ Միջերկրական ծովերի մերձափնյա շրջանները հանգուցող նավթամուղը օրական 1,5 մլն բարել նավթ տարանցելու հնարավորություն է ունենալու: Այդ նախագծին մասնակցող թուրքական Calik-ն ու իտալական Eni-ի ընկերությունները կունենան 50-ական տոկոս բաժնեմասեր:
Ռուսաստանն այդ նախագծին որոշել էր միանալ այն բանից հետո, երբ Թուրքիան համաձայնել էր մասնակցել «Հարավային հոսք» գազատարի շինարարության նախագծին, որը ռուսական գազը Եվրոպա է հասցնելու Սեւ ծովի հատակով եւ Ուկրաինայի շրջանցմամբ:
