Նոյեմբերի 5-ին Լոնդոնի Albemarle պատկերասրահում կբացվի հայազգի նկարիչ Արշակ Սարգսյանի ցուցահանդեսը: Նրա հետ իր գործերը կցուցադրի նաեւ հայտնի իտալացի վարպետ Լուիջի Բենեդիչենտին: Երեկ Մեծ Բրիտանիայի դեսպան Չարլզ Լոնսդեյլը կազմակերպել էր ընդունելություն Արշակի պատվին: «Հայաստանի արվեստագետների հետ հանդիպումներն ու ծանոթությունները իմ մեծագույն հաճույքներից ու ոգեշնչման աղբյուրներից են, եւ նրանց թվում է, անշուշտ, նաեւ Արշակը,- ասաց դեսպանը,- այն փաստը, որ Արշակը կարողացել է ցուցահանդես ունենալ Լոնդոնի շատ լուրջ պատկերասրահում՝ արդեն խոսում է նրա տաղանդի մասին»: Հայազգի նկարիչն էլ նշեց, որ իր համար մեծ պատիվ է ստանալ դեսպան Լոնսդեյլի բարոյական աջակցությունը:
Գյումրիում ծնված Արշակ Սարգսյանը արժանացել է մասնագետների բարձր գնահատականին՝ յուրահատուկ էքսպրեսիոնիզմի ոճով գեղանկարների եւ քանդակների համար: Արշակը արժանացել է նաեւ ՀՀ նախագահի մրցանակին՝ գեղանկարչության ոլորտում նվաճումների համար: Նրան համարում են Երեւանի երիտասարդության վիզուալ պոետը:
