![\"\"](\"https://www.aravot.am/2009/aravot_arm/October/22/p13.jpg\")
Աֆղանստանում, այնուամենայնիվ, նախագահական ընտրությունների երկրորդ փուլ կլինի: Այդ ընտրությունների նախօրեին, որից, ի դեպ, մեծապես կախված է միջազգային հանրության վստահությունն ու հետեւաբար նաեւ աջակցությունն այդ երկրի նկատմամբ, կփոխվի ընտրական տեղական հանձնաժողովների ղեկավարների կեսից ավելին: «Reuters»-ի փոխանցմամբ, դրա նպատակը սպասվող նոր քվեարկության արդյունքները կրկին կեղծելու հնարավորությունը կանխելն է: «Ընտրական՝ ավելի քան 200 շրջանային հանձնաժողովների համակարգողների կեսից ավելին (Աֆղանստանում գործում է 380 շրջանային ընտրական հանձնաժողով) կփոխարինվի նախ՝ կեղծիքի որեւէ նոր փորձ կանխելու նպատակով, ապա այն պատճառով, որ ընտրությունների 1-ին փուլում նրանցից դժգոհել են նաեւ թեկնածուներն ու դիտորդները»,- ասել է ՄԱԿ-ի ներկայացուցիչ Ալիմ Սիդդիկեն:
Անցած երեքշաբթի օրը Աֆղանստանի գործող նախագահ Համիդ Քարզայը երկար բանակցություններից հետո համոզվել եւ համաձայնել էր ընտրությունների երկրորդ փուլի անցկացմանը, ինչը Անկախ ընտրական հանձնաժողովի պահանջն էր: Ընտրությունների երկրորդ փուլը, որին որպես թեկնածուներ կմասնակցեն Աֆղանստանի նախագահ Համիդ Քարզայն ու նրա հիմնական ընդդիմախոս, Աֆղանստանի ԱԳ նախկին նախարար Աբդուլլա Աբդուլլան, տեղի կունենա նոյեմբերի 7-ին:
