Panorama.am կայքից տեղեկանում ենք, որ իրանական mehr գործակալությունը, վկայակոչելով Իրանի առողջապահության նախարարության կրթության բաժնի վարիչ Գուլամռզա Հասանզադեին, տեղեկացրել էր, որ Հայաստանի բժշկական համալսարանի ավարտական դիպլոմները Իրանում անվավեր են համարվելու: Իրանական կողմի ընդունած այդ որոշումը վերաբերելու է 2010 թ. շրջանավարտներին: Նույն «բախտին» են արժանացել Ուկրաինայի բժշկական բուհերը: Այս կապակցությամբ կայքէջը պարզաբանում է խնդրել ԵՊԲՀ ղեկավարությունից: Համալսարանի աշխատակազմի ղեկավարը Panorama.am-ի թղթակցի հարցից զարմացավ եւ ասաց, որ «նման բան հնարավոր չէ»: Բուհի միջազգային կապերի գծով պրոռեկտոր Երվանդ Սահակյանն էլ փոխանցեց, որ նման բան չկա եւ Իրանի քաղաքացիները կարող են ուսանել ԵՊԲՀ-ում:
