Հատուկ քննչական ծառայությունում ավարտվել է ոստիկանության Կոտայքի մարզային վարչության ՔՀԲ օպերլիազորի կողմից կաշառք ստանալու դեպքի առթիվ հարուցված քրեական գործի նախաքննությունը: Ըստ ՀՀ գլխավոր դատախազության մամուլի ծառայության, օպերլիազոր Մ. Յախանյանը, 2008թ. դեկտեմբերի 17-ին դիտավորությամբ ոստիկանության մարզային վարչություն բերման է ենթարկել քաղաքացիներ Ա. Իգնատենկոյին եւ Մ. Մկոյանին՝ իբր տեղի ունեցած վրաերթի կապակցությամբ ճանաչման ներկայացնելու պատրվակով: Սակայն Մ. Յախանյանը քաղաքացիներ Իգնատենկոյին եւ Մկոյանին հայտնել է, թե նրանց բերման ենթարկելու իրական պատճառը մարմնավաճառներ Մ. Պողոսյանի եւ Հ. Բաբայանի բողոքն է՝ նախորդ օրը Աբովյան քաղաքի «Ղարս» ռեստորանային համալիրում իրենց բռնաբարելու մասին: Մ. Յախանյանը, առանց բռնաբարության մասին հաղորդում ընդունելու եւ այն գրանցելու, սկսել է այդ կապակցությամբ նյութեր նախապատրաստել: Բռնաբարության մեղադրանքով քրեական գործ չհարուցելու համար Ա. Իգնատենկոյից եւ Մ. Մկոյանից Մ. Յախանյանը պահանջել է $3000 գումար: Սակայն սակարկելու արդյունքում համաձայնության են եկել $1500-ի շուրջ, որից հետո միայն Մ. Յախանյանը նրանց ազատ է արձակել: Մ. Յախանյանը Ա. Իգնատենկոյից եւ Մ. Մկոյանից շորթմամբ ստացել է $1500 կաշառք:
