Իսկ Երեւանի քաղաքապետարանում հավատացնում են, թե թերի գործ չի կատարվել
![\"\"](\"https://www.aravot.am/2009/aravot_arm/October/16/p11.jpg\")
Երեւանի քաղաքապետ Գագիկ Բեգլարյանը, այս տարվա գարնանն ստանձնելով իր պաշտոնը, երեւանցիների համար սպասված նախաձեռնությամբ հանդես եկավ եւ խոստացավ կարճ ժամանակահատվածում բարեկարգել մայրաքաղաքի բոլոր բակային տարածքները: Որոշ համայնքներում այս ուղղությամբ լայնածավալ աշխատանք կատարվեց, սակայն քաղաքապետարանի այս նախաձեռնությունը մի շարք բակերում, մեղմ ասած, թերի է կյանքի կոչվում: Այս տարվա ապրիլի 1-ից բակաշինության ծրագիրը մեծ թափով մեկնարկեց Նոր Նորք եւ Ավան համայնքներում, սակայն հետագայում նույն թափով չշարունակվեց: Եթե նախկինում հայտարարվում էր, թե բոլոր թաղային համայնքների սանմաքրման ձեռնարկությունների միասնական ջանքերով ծրագիրը կարճ ժամանակահատվածում համայնք առ համայնք կյանքի կկոչվի, ապա այսօր արդեն ժամկետները երկարաձգվում են: «Բարեկարգման տարբեր տեսակի աշխատանքներ կկատարվեն առաջիկա 3-4 տարիների ընթացքում: Բակերի բարեկարգման աշխատանքները շարունակական են, եւ վերջնական ժամկետ չի սահմանվում»,- «Առավոտին» տեղեկացրեց Երեւանի քաղաքապետարանի շինարարության եւ բարեկարգման վարչության պետ Ֆրունզ Բասենցյանը:
Լուսանկարում պատկերված բակը գտնվում է Շենգավիթ վարչական շրջանում: Այն ոչ նախկին, ոչ ներկա քաղաքապետերի օրոք բարեկարգման «երես չի տեսել»: Արտաշիսյան 53/15, 53/14 շենքերի բնակիչները, տեսնելով, որ քաղաքապետի խոստացած բարեկարգման մեքենա-մեխանիզմներն այդպես էլ իրենց բակ չեն մտնում, արդեն հուսահատվել են: Վերոնշյալ ծրագրի շրջանակներում բարեկարգման անվան տակ այս բակում միայն արտաքին լուսավորության ցանցն է վերականգնվել: Այստեղ չեն տեղադրվել զրուցարաններ, խաղահրապարակ, տարածքի մի մասն ասֆալտապատ չէ, կանաչ տարածքների մասին էլ խոսք լինել չի կարող:
Աջափնյակ համայնքի Շինարարների 14, 16, եւ 18 շենքերի բակի բարեկարգումն սկսվել էր Երեւանի ավագանու ընտրությունների նախաշեմին: Սակայն աշխատանքները կիսատ են մնացել՝ մինչ օրս խոստացված խաղահրապարակը չի կառուցվել, կանաչապատում եւ ծաղկապատում չի կատարվել:
Այսօր մայրաքաղաքի տարբեր համայնքներում նմանօրինակ բակերի կարելի է հանդիպել: Մոռացության է մատնված նաեւ դրանց մաքրության հարցը:
Բակաշինության աշխատանքների նկատմամբ վերահսկողություն սահմանելու մասին հարցին Ֆ. Բասենցյանը պատասխանեց. «Քաղաքապետարանի ծրագրերով իրականացվող շինարարական աշխատանքների նկատմամբ տեխնիկական հսկողության ծառայություններն իրականացնում է մրցույթով շահող ճանաչված կազմակերպությունը: Քաղաքապետարանի համապատասխան ստորաբաժանումները, հանդիսանալով աշխատանքի պատվիրատու, կատարում են վերահսկողական ֆունկցիաներ»: Այդ դեպքում ինչո՞ւ են բակերը թերի բարեկարգվում՝ հարցին ի պատասխան՝ քաղաքապետարանի պաշտոնյան նշեց. «Թերի գործ չի կատարվում, այն բակերում, որոնցում ինչ-որ աշխատանք չի կատարվել՝ հետագայում կլրացվի: Տարիների ընթացքում բոլոր բակերը նույն տեսքը կունենան»: Ֆ. Բասենցյանի խոսքով, միանգամից բոլոր աշխատանքներն իրականացնել հնարավոր չէ, քանի որ մեծ խնդիրներ կան, պետք է լուծել բնակիչների կողմից ապօրինի զավթված տարածքների հարցը:
