Վարչապետ Տիգրան Սարգսյանը ՀՀ էկոնոմիկայի նախարար Ներսես Երիցյանին հանձնարարել է 2 ամսվա ընթացքում մշակել Հայաստանում վճարովի ավտոճանապարհներ կառուցելու եւ շահագործելու ծրագիրը՝ հատուկ ներդրողների համար: Ու քանի որ «Հյուսիս-Հարավ» ավտոճանապարհը կառուցվելու է Ասիական զարգացման բանկի (ԱԶԲ) աջակցությամբ, վարչապետը հանձնարարել է հարցը քննարկել նաեւ բանկի ներկայացուցիչների հետ՝ ճանապարհի շինարարության ծրագրում վճարովի ճանապարհների կառուցման հնարավորությունը ներառելու համար: Մեր կառավարությունը հույս ունի, որ վճարովի ավտոճանապարհի գաղափարը, բացի ԱԶԲ-ից, կգայթակղի նաեւ այլ ներդրողների, որոնք գումար կտրամադրեն՝ ծրագրի իրականացման համար:
