![\"\"](\"https://www.aravot.am/2009/aravot_arm/October/14/p14.jpg\")
Արագածոտնի մարզկենտրոն Աշտարակ քաղաքում գտնվող հայկական հնագույն եկեղեցիներից մեկը՝ Ծիրանավորը (5-րդ դար) քայքայման եւ փլուզման եզրին է: Տարբեր ժամանակաշրջաններում եւ տարբեր պատճառներով եկեղեցու պատերից ընկած քարերը քարակույտերի են վերածվել:
Ինչպես «Առավոտին» ներկայացրեց Արագածոտնի հուշարձանների պաշտպանության մարզային ծառայության պետ Տարոն Մանուկյանը, մարզում արդեն մի քանի եկեղեցիներ վերանորոգվել են, բայց Ծիրանավորն ու էլի ուրիշ եկեղեցիներ կան, որ վերականգնման կարիք ունեն: Ըստ Տարոն Մանուկյանի, պետական բյուջեի սղության պատճառով առայժմ Ծիրանավորը վերանորոգվելիք հուշարձանների ցուցակում ընդգրկված չէ: Այս եկեղեցին մասնակի վերանորոգվել է խորհրդային տարիներին: Անկախությունից հետո սփյուռքահայ բարերարներից մեկը ցանկություն է հայտնել օժանդակելու եկեղեցու վերանորոգմանը, սակայն, ըստ մեր տեղեկությունների, մարզային իշխանությունները եւ սփյուռքահայը ընդհանուր լեզու չեն գտել:
Զավեշտ է. մի կողմից աղմուկ է բարձրացվում Նախիջեւանում հայկական հուշարձանները ոչնչացնելու դեմ, մյուս կողմից՝ չհասկացվող անտարբերություն է այսօրվա Հայաստանում գտնվող հուշարձանների նկատմամբ:
