Երեկ ՀՅԴ կուսակցության խորհրդաժողովի ժամանակ, խմբակցության անդամ, ԱԺ պատգամավոր Արծվիկ Մինասյանը ներկայացրել է իրենց կատարած ուսումնասիրությունների արդյունքները՝ այն մասին, թե հայ-թուրքական սահմանի բացումն ինչ վտանգավոր հետեւանքներ կարող է ունենալ մեր երկրի համար: Ելույթի սկզբում պատգամավորը հայտարարել է, որ ոչ մի լուրջ հիմնավորում չկա այն մարդկանց ասածների մեջ, ովքեր պնդում են, թե սահմանի հնարավոր բացման դեպքում Հայաստանի տնտեսությունը զարգացում է ապրելու: Ըստ Ա. Մինասյանի, այն ձեռնտու է միայն Թուրքիային, քանի որ անհամեմատ ավելի հզոր տնտեսական հնարավորություններ ունի, քան Հայաստանը, հետեւապես երկու երկրների միջեւ համատեղ շահ չի կարող գոյություն ունենալ:
Խորհրդաժողովի ժամանակ Ա. Մինասյանը նշեց նաեւ, որ Թուրքիան մշտապես խախտում է տնտեսական կանոններում ամրագրված միջազգային բոլոր տեսակի հարաբերությունները, եւ ԱՀԿ-ի կողմից ճանաչվել է որպես ամենաանհուսալի գործընկեր:
