Ֆրանսիայի նախագահ Նիկոլա Սարկոզիի Ղազախստան կատարած այցի ընթացքում երկու երկրների միջեւ ստորագրվել են էներգետիկայի ու առեւտրի ոլորտում համագործակցության շուրջ 6 մլրդ դոլար արժողությամբ համաձայնագրեր: «BBC»-ի փոխանցմամբ, բացի այս, Ղազախստանը համաձայնել է Ֆրանսիային թույլ տալ իր տարածքով ռազմական բեռներ տեղափոխել Աֆղանստան: Խոշորագույն գործարք է կնքվել նաեւ ֆրանսիական Total եւ GDF Suez ընկերությունների եւ «Կազմունայգազ» ղազախական պետական ընկերության միջեւ՝ Կասպից ծովի Խվալինսկի հատվածում գազի հանքավայրի շահագործման վերաբերյալ: Կնքված գործարքի համաձայն, ֆրանսիական ընկերություններին պատկանելու են նոր կոնսորցիումի կապիտալի 25 տոկոսը, եւս 25 տոկոսը մնալու է ղազախական ընկերության ձեռքում, իսկ մնացած 50 տոկոսը պատկանելու է ռուսական «ԼՈՒԿՕՅԼ» նավթային կորպորացիային: Համաձայնագիր է կնքվել նաեւ Spie Capag շինարարական կոնսորցիումի հետ՝ նոր գազատարի շինարարության շուրջ: Աղբյուրի փոխանցմամբ, այդ խողովակաշարով Կասպից ծովի Քաշաղան խոշորագույն հանքավայրից գազն Արեւմուտք է տեղափոխվելու գոյություն ունեցող ռուսական գազատարի շրջանցմամբ: Միաժամանակ ֆրանսիական երկաթուղային խոշոր ընկերությունը՝ Alstom-ը, Աստանայում կառուցելու է տրամվայի գծեր, իսկ Thales հայտնի պաշտպանական կորպորացիան ղազախական բանակին տրամադրելու է դաշտային ռադիոկայաններ:
«BBC»-ն նկատել է, որ այս խոշորագույն պայմանագրերը կնքվել են Ղազախստանի իշխանությունների հասցեին ուղղված՝ մարդու տարրական իրավունքների խախտումների եւ ժողովրդավարական ազատությունների ոտնահարման փաստերի առնչությամբ անընդհատ հնչող քննադատության ֆոնի վրա: Չնայած այդ քննադատություններին, Ղազախստանը պատրաստվում է դառնալ նախկին ԽՍՀՄ առաջին հանրապետությունը, որը զբաղեցնելու է ԵԱՀԿ նախագահի պաշտոնը: Սարկոզին արդեն պաշտպանել է այդ թեկնածությունը՝ այն որակելով որպես «խաղաղության օգտին կատարված ընտրություն»:
