Ինչպես հայտնի է, արդեն վաղուց շարունակվում է նախկին «Հայեր» խմբի երգչուհիներ Նելլի Պողոսյանի, Ժակլին Թումանյանի եւ Արշալույս Սարգսյանի սառը պատերազմը՝ նրանց նախկին պրոդյուսեր Նադեժդա Սարգսյանի հետ: ankakh.com-ը գրում է, որ աղջիկները պնդում են, թե «Հայեր» խմբի «փլուզման» իրական պատճառն այն է, որ 8 տարի երգելով խմբում՝ իրենք ոչ մի կոպեկ չեն ստացել, իսկ Նադեժդա Սարգսյանը հարստացել է իրենց հաշվին: Այս տարի «Հայեր» խմբի երգչուհիները՝ առանց Էմմիի, որոշեցին նորից վերադառնալ երգարվեստ՝ բեմում հանդես գալով «Նելլի, Ժակլին, Արշալույս» անվամբ: Սակայն աղջիկների ճանապարհը փակվեց, նկարահանված տեսահոլովակները ընդամենը մի քանի անգամ հայտնվեցին եթերում: Աղջիկներն ասում են, որ մի շարք հեռուստաընկերություններ եւ նույնիսկ ամսագրեր հրաժարվում են իրենց ներկայացնել:
Աղջիկների վերջին տեսահոլովակների ռեժիսոր, դիզայներ Վահան Խաչատրյանն էլ, ըստ ankakh.com-ի, ասում է, որ Նադեժդա Սարգսյանը «ուլտիմատում» է ներկայացրել բոլոր հեռուստաընկերություններին, որ կամ աղջիկներին ցույց տան, կամ Էմմիին, իսկ նրանք էլ, բնականաբար, Էմմիին են ընտրել: ankakh.com-ը հավելում է, որ Նադեժդա Սարգսյանը հրաժարվել է մեկնաբանել աղջիկների ասածները եւ իրեն ուղղված այլեւայլ մեղադրանքներ:
