Սեպտեմբերի 7-11-ը Լիտվայի Կաունաս քաղաքում տեղի ունեցավ «21-րդ դարի երիտասարդը» խորագրով լուսանկարչական մրցույթի հաղթողների պարգեւատրման արարողությունը, ինչպես նաեւ պատանեկան լուսանկարչության արդի խնդիրներին նվիրված սեմինարը, որին մասնակցում էին 15-25 տարեկան 66 երիտասարդ լուսանկարիչներ՝ Ֆրանսիայից եւ ԱՊՀ երկրներից: Սեմինարի անցկացմանը նախորդել էր «21-րդ դարի երիտասարդը» լուսանկարչական միջազգային մրցույթը, որին ներկայացվել էին պատանի լուսանկարիչների 577 աշխատանքներ: Մրցույթը նախաձեռնել եւ հովանավորել էին Լիտվայի ԿԳ նախարարությունը եւ Լիտվայի լուսանկարիչների միությունը։ Մրցույթի տեղեկատվական հովանավորներից էր նաեւ «Հայաստանի մանուկներ» հիմնադրամը: Մրցույթին «Հայաստանի մանուկներ» հիմնադրամի լուսա- եւ տեսանկարահանումների պատանեկան ակումբների սաները ներկայացրել էին 11 լուսանկար, որոնցից լեռնագոգցի 15-ամյա Մանուշակ Ավագյանի «Մուրացկանները» լուսանկարների շարքը ճանաչվեց հաղթող՝ ստուդիայում կատարած լավագույն լուսանկար անվանակարգում:
