![\"\"](\"https://www.aravot.am/2009/aravot_arm/October/3/p20.jpg\")
Սեպտեմբերի 30-ի առավոտյան արտակարգ իրավիճակ էր ստեղծվել Կապանի մուտքի թունելի մոտ: Լանջից պոկված հսկայական ժայռաբեկորների հոսքից փակվել էր թունելի մուտքը, ու խափանվել էր այս հատվածում տրանսպորտային միջոցների երթեւեկությունը: Բարեբախտաբար, քարաթափման պահին այդտեղ մեքենաներ չեն եղել եւ տուժածներ չկան: Արտակարգ դեպքից մոտ երկու ժամ անց ճանապարհը մաքրված է եղել հսկայական քարերից եւ դարձել անցանելի:
Արտակարգ իրավիճակների նախարարության փրկարարական ծառայության Սյունիքի մարզային վարչությունից մեզ տեղեկացրին, որ այս հատվածում լանջի թեքության պատճառով քարաթափ հաճախակի է լինում: Սեպտեմբերի 30-ի դեպքի պատճառը վերջին օրերին անընդհատ տեղացող անձրեւներն են:
Այս օրերին ճանապարհը բաց է, բայց ոչ մի երաշխիք չկա, որ ամեն պահի դեպքը չի կրկնվի, իսկ օրվա ընթացքում Կապանի Գործարանային թաղամասի այս թունելով, որը նաեւ Երեւան-Մեղրի մայրուղու մի հատվածն է, բազմաթիվ մեքենաներ են անցնում:
