ՀԱՊԿ անդամ երկրների միջեւ ռազմատեխնիկական համագործակցությունը կակտիվանա. կստեղծվեն համատեղ ձեռնարկություններ:
Բրեստում սեպտեմբերի 30-ին կայացած ՀԱՊԿ անվտանգության խորհրդի քարտուղարների կոմիտեի 19-րդ նիստում միաձայն ընդունվել են Հայաստանի Ազգային անվտանգության խորհրդի քարտուղար Արթուր Բաղդասարյանի երեք առաջարկությունները:
Ըստ Ազգային անվտանգության խորհրդի մամուլի ծառայության, առաջին առաջարկը վերաբերել է ՀԱՊԿ անդամ երկրների միջեւ ռազմատնտեսական համագործակցությունն ակտիվացնելուն: ՀԱՊԿ ռազմատնտեսական համագործակցության միջպետական հանձնաժողովին հանձնարարվել է հերթական նիստի ժամանակ քննարկել ռազմատեխնիկական համագործակցության հարցերը, պատրաստել փաստաթղթերի փաթեթ, որոնցով կնախանշվեն համատեղ ձեռնարկություններ ստեղծելու մեխանիզմները: Հայաստանում, Ռուսաստանում, Բելառուսում, Ղազախստանում կան մեծ թվով ձեռնարկություններ, որոնք շահագրգիռ են իրականացնել երկկողմ ռազմատեխնիկական համագործակցություն, խթանել համատեղ արտադրությունը՝ զարգացնելու ռազմաարդյունաբերական համալիրը: Արթուր Բաղդասարյանը նշել է, որ հայկական կողմն այս խնդրի լուծման նպատակով մշակել է առաջարկների ամբողջական փաթեթ:
Առաջարկվել է ՀԱՊԿ անդամ երկրներում համակարգված տեղեկատվական քաղաքականության ձեւավորման ուղղությամբ գործնական քայլեր կատարել: «Հայաստանում արդեն մշակվել եւ հավանության է արժանացել տեղեկատվական անվտանգության հայեցակարգը: Տեղեկատվական անվտանգության համակարգը զարգացնելու համար անհրաժեշտ է մշակել եւ իրականացնել միասնական ծրագիր, որը ենթադրում է տեխնիկական պաշտպանվածության լրացուցիչ երաշխիքներ»,- ասել է Արթուր Բաղդասարյանը:
Հայաստանի անվտանգության խորհրդի քարտուղարն առաջարկել է համատեղել ջանքերը ՀԱՊԿ անդամ երկրների իրավապահ մարմինների եւ հատուկ ծառայությունների կադրերի պատրաստման եւ վերապատրաստման գործում: Որոշվել է մշակել միջպետական նպատակային ծրագիր, որը հնարավորություն կտա պաշտպանության, արտակարգ իրավիճակների նախարարությունների, ոստիկանության եւ ազգային անվտանգության համակարգի կադրերին վերապատրաստում անցնել ՀԱՊԿ շրջանակում:
Հայկական կողմի առաջարկով նիստում քննարկվել է նաեւ ՀԱՊԿ արագ արձագանքման ուժերը ժամանակակից զինատեսակներով ու ռազմական տեխնիկայով ապահովելու հարցը: ՀԱՊԿ գլխավոր քարտուղարությանը հանձնարարվել է մշակել միջպետական նպատակային ծրագիր:
Նշված առաջարկներն ամրագրվել են ՀԱՊԿ անվտանգության խորհրդի քարտուղարների կոմիտեի որոշումներում: Նիստում քննարկվել են նաեւ ՀԱՊԿ անդամ երկրներում ռազմաքաղաքական իրավիճակի զարգացմանը, թմրամիջոցների ապօրինի շրջանառության դեմ պայքարի գործում ՀԱՊԿ անդամ երկրների ջանքերի համատեղմանը վերաբերող հարցեր:
