Հայաստանի դահուկային սպորտի ֆեդերացիայից երեկ տեղեկացրին, որ մեր հանրապետության դահուկավազորդները, առաջին անգամ մասնակցելով Հունաստանի Սալոնիկ քաղաքում անցկացված անվադահուկներով վազքի աշխարհի գավաթի խաղարկությանը, լուրջ հաջողությունների են հասել:
ՖԻՄԱ ակումբի անդամ աշոցքցի դահուկորդներ Սերգեյ Միքայելյանը եւ Արգամ Գրիգորյանը, հանդես գալով երիտասարդների մրցաշարում, մտել են եզրափակիչ, որտեղ հանդես գալու իրավունք նվաճել են 27 դահուկային հզոր երկրների մարզիկներ: Տրված ընդհանուր մեկնարկից հետո 11 կմ վերընթաց մրցատարածությունը (մեկնարկի եւ եզրագծի միջեւ ուղղահայաց տարբերությունը կազմել է 819 մետր) առաջինը հաղթահարել է Սերգեյ Միքայելյանը: Նրա թիմակից Արգամ Գրիգորյանը վերջնագիծը հատել է վեցերորդը: Մեր թիմի երրորդ ներկայացուցիչը՝ Համլետ Զիրոյանը, մրցատարածությունում դահուկափայտի հետ առաջացած տեխնիկական խնդրի պատճառով պայքարն անավարտ է թողել:
Հետաքրքիր է, որ հայաստանցի դահուկորդները, մարզիչ Արթուր Միքայելյանի ղեկավարությամբ, այս մրցմանը նախապատրաստվել են հարազատ Աշոցքի քարուքանդ ասֆալտե ճանապարհներում:
Այս հաջողությունը հույս է ներշնչում, որ մեր երիտասարդ դահուկորդներն ամառային մարզումների շնորհիվ կպահպանեն լավ մարզավիճակ եւ ձմեռային մրցուղիներում էլ բարձր արդյունքներ ցույց կտան:
