2008թ. օգոստոսին Վրաստանում տեղի ունեցած հակամարտության հետաքննություն իրականացնող միջազգային անկախ առաքելությունը այսօր՝ սեպտեմբերի 30-ին, կհրապարակի իր զեկույցը: Սպասվում է, որ եվրոպական փորձագետները պատերազմ սկսելու մեջ կմեղադրեն Թբիլիսիին, իսկ Մոսկվան կենթարկվի քննադատության՝ դրան ոչ համարժեք արձագանքելու համար: Այսօր Բրյուսելում առաքելության ղեկավար Հայդի Թալյավինին, որը 2002-2006թթ. եղել է Վրաստանում ՄԱԿ-ի ներկայացուցիչը, մի քանի ամսվա աշխատանքի արդյունք հանդիսացող իր զեկույցը կփոխանցի ԵՄ անդամ երկրների դեսպաններին, իսկ փաստաթղթի պատճենները՝ ՌԴ-ի, Վրաստանի, ԵԱՀԿ-ի եւ ՄԱԿ-ի ներկայացուցիչներին: «Newsru»-ի աղբյուրների մատուցմամբ, Թալյավինիի հաշվետվությունը կհրապարակվի չնայած այն մտավախություններին, թե՝ 900 էջանոց փաստաթղթում պարունակող տեղեկատվությունը կարող է համատեքստից դուրս բերված լինել ու հանգեցնել տարածաշրջանում նոր լարվածության:
Աղբյուրի փոխանցմամբ, փաստաթղթի քննարկում՝ ԵՄ անդամ երկրների, ինչպես նաեւ ՌԴ-ի, Վրաստանի, ԵԱՀԿ-ի եւ ՄԱԿ-ի դիվանագետների մասնակցությամբ, նախատեսված չէ:
