Ֆինանսական ճգնաժամի հետեւանքով, այս տարի ժամանակավորապես դադարեցվել է երթուղային տաքսիները ավտոբուսներով փոխարինելու ծրագիրը: Այս մասին «Առավոտին» տեղեկացրեց քաղաքապետարանի տրանսպորտի վարչության գլխավոր մասնագետ Կարեն Հակոբյանը: Ճանապարհային երթեւեկության բեռնաթափման ծրագրի շրջանակում ընդհանուր առմամբ 71 ավտոբուս փոխարինել է 157 միկրոավտոբուսների՝ 6 երթուղիներում: «Այս տարի միայն 4-րդ երթուղում 12 նոր «Նեման» մակնիշի փոխադրամիջոցներ են երթուղի մտել, բայց ոչ փոխարինման ձեւով»,- ասաց Կ. Հակոբյանը: Ծրագրի շրջանակներում ավտոբուսներ էին ներկրվել Հայաստան՝ դեռեւս 3 տարի առաջ, ներկրման ծախսերից տրանսպորտի վարչությունը տեղեկություններ չունի, քանի որ նման հարցերով իրենք չեն զբաղվում: «Առավոտի» հետ զրույցում տրանսպորտի վարչության պետ Արման Միրիջանյանն էլ ասաց. «Մենք աշխատում ենք այն ընկերությունների հետ, որոնք սեփական միջոցներով են ներդրումներ եւ ներկրումներ իրականացնում, տրանսպորտի վարչությունն էլ հոգում է փոխադրամիջոցների ընդգրկումը՝ համապատասխան երթուղիներ»:
