Պետբյուջեից տրվող սուբվենցիայով (բնապահպանական վճարներից մասհանում) հուլիսի 31-ից մաքրվում էր Կապան քաղաքի միջով հոսող Ողջի գետի հատվածը: Մաքրման աշխատանքներն արդեն ավարտվել են: Այս նպատակի համար առանձնացվել էր 13,89 միլիոն դրամ: Հիմնականում մաքրվել է քաղաքի կենտրոնական փողոցով, Մեղրի-Երեւան միջպետական ճանապարհի երկայնքով անցնող՝ Հունան Ավետիսյան փողոցի կամրջից մինչեւ Դավիթ-Բեկի հրապարակի կամուրջն ընկած Ողջի գետի հատվածը: Այդ աշխատանքներն իրականացրել է մրցույթում հաղթող ճանաչված «ՖԲՋ» ընկերությունը:
Գետը մաքրվել է քարերից, կուտակված ջրաբերուկներից եւ աղբից: Սակայն գետի այդ հատվածը աղբից մաքրելուց ոչ շատ անց կարիք առաջացավ նույն հատվածը կրկին մաքրել: Բնակիչներն առանց վարանելու շտապեցին աղբը կրկին լցնել իրենց համար արդեն որպես աղբատեղի ծառայող Ողջի գետը, այնինչ, մի քանի քայլ այն կողմ աղբամաններ են դրված:
