![\"\"](\"https://www.aravot.am/2009/aravot_arm/September/26/p13.jpg\")
Ամերիկաբնակ հայտնի հայ գործարար Ջերարդ Գաֆեսճյանը որոշել է այլեւս Հայաստանում բիզնեսով չզբաղվել եւ եղած-չեղածը վաճառել: Վերջերս էլ լուրեր են շրջանառվում, որ Ջ. Գաֆեսճյանը դադարեցրել է իրեն պատկանող «Կասկադ բանկի» ֆինանսավորումը եւ վաճառել է բանկի բոլոր բաժնետոմսերը:
«Առավոտը» փորձեց «Կասկադ բանկի» տնօրինությունից ճշտել այս տեղեկությունների հավաստիությունը, որտեղից էլ ստացանք հետեւյալ պատասխանը. «Ոչ մի «քոմենտ» չենք ուզում անել: Նախկինում էլ են եղել դեպքեր, երբ նմանատիպ լուրեր են տարածել, սակայն կյանքը ցույց տվեց, որ նման բան չի եղել: Այդ ժամանակ եւս մենք պաշտոնական ոչ մի հայտարարություն չէինք արել»:
Հիշեցնենք, որ «Առավոտի» ապրիլի 24-ի համարում անդրադարձել էինք այս թեմային՝ նշելով, որ «Կասկադ բանկի» վրա աչք ունի «Տրոյկա Դիալոգ» ընկերության սեփականատեր Ռուբեն Վարդանյանը, որին պատկանում է «Ամերիաբանկը»:
