Բրազիլիան ՄԱԿ-ի Անվտանգության խորհրդից պահանջել է արտակարգ նիստ գումարել՝ Հոնդուրասում ստեղծված իրավիճակի հետ կապված որոշումներ ընդունելու համար: ՄԱԿ-ում Բրազիլիայի մշտական ներկայացուցիչը երեկ համապատասխան նամակով արդեն դիմել է Խորհրդի նախագահին: Հիշեցնենք, որ Հոնդուրասում երեկվանից զանգվածային անկարգություններ եւ ոստիկանության ուժերի հետ բախումներ են սկսվել՝ այն բանից հետո, երբ այդ երկրի վտարանդի նախագահ Մանուել Սելայան անակնկալ կերպով հայրենիք է վերադարձել եւ պատսպարվել է Բրազիլիայի դեսպանատանը: Ի դեպ, Հոնդուրասի իշխանությունների որոշմամբ, դադարեցվել է դեսպանատանը ջրի եւ էլեկտրաէներգիայի մատակարարումը: Բրազիլացիները դիմել են ամերիկյան կողմին՝ իրենց դիվանագիտական ներկայացուցչությունը պաշտպանելու հարցում աջակցություն ստանալու խնդրանքով: Հոնդուրասի ժամանակավոր իշխանությունները Բրազիլիայից շարունակում են պահանջել իրենց հանձնել նախկին նախագահին:
