Սպառողների ասոցիացիայի նախագահ Արմեն Պողոսյանը երեկ «Առավոտի» հետ զրույցում ասաց, որ Երեւանի փողոցներով ամեն օր երթեւեկող միկրոավտոբուսների օրական հասույթը կազմում է 270-300 հազար դոլարին համարժեք դրամ, որի չնչին մասն է մտնում բյուջե՝ մոտ 10-12%-ը: Նրանց ասոցիացիայի կողմից արած հարցմանը Պետեկամուտների կոմիտեն պատասխանել է, որ անցյալ տարի ավտոտրանսպորտային գործունեությունից որպես հաստատագրված հարկ վճարվել է 2 միլիարդ 503 միլիոն դրամ: «Մեզ հետաքրքիր էր, թե առանձին-առանձին որ տրանսպորտը որքան հարկ է վճարել պետբյուջե՝ եռամսյակային կտրվածքով, սակայն մեզ ասացին, որ նման հաշվարկ չկա: Չենք կարող ասել, թե ինչքան գումարն է յուրացվում 3200 միկրոավտոբուսների գծատերերի կողմից, քանի որ ոչ մի պետական գերատեսչություն մեզ հստակ պատասխան չի տալիս»,- դժգոհեց պարոն Պողոսյանը: Մեր հարցին, թե ի՞նչ հաշվարկներով են ստացել վերոնշյալ թվերը, նա պատասխանեց. «Մենք վերցրել ենք քաղաքապետարանի 1,5 տարի առաջվա տվյալները եւ համեմատել մեր մոտավոր հաշվարկների հետ: Ամեն մեքենայի համար կան հաստատագրված թվեր, որոնց հիման վրա էլ արվում է մուծումը. բանն այն է, որ այդ հաստատագրված հարկերը չեն արտացոլում իրական շրջանառության թվերը: Մենք հաշվարկել ենք միայն հասույթը, որի մեջ մտնում են նաեւ ընթացիկ ծախսերը, սակայն, միեւնույն է, միկրոավտոբուսներից քիչ հարկ է գոյանում»:
Ա. Պողոսյանը փաստեց, որ երթուղիների սեփականատերերն ընդամենը 5-6 հոգի են, որոնք կամ պատգամավոր են, կամ կառավարությունում են աշխատում, կամ էլ գեներալ են:
