Անտվերպենում (Բելգիա) մեկնարկած շախմատի 15-րդ կարգի «InventiChess 2009» միջազգային մրցաշարում Հայաստանի միակ ներկայացուցիչ, շախմատի համաշխարհային օլիմպիադայի հաղթող, գրոսմայստեր Գաբրիել Սարգսյանը չորս տուրից հետո միջին դիրքեր է զբաղեցնում: Նա առաջին տուրում սեւ խաղաքարերով տանուլ է տվել ֆրանսիացի Էտյեն Բակրոյին, երկրորդում եւ երրորդում միավորը բաժանել, համապատասխանաբար, Էմիլ Սուտովսկու (Իսրայել) եւ Բարտոշ Սոչկոյի (Լեհաստան) հետ, չորրորդում նույնպես սեւերով պարտության է մատնել բուլղարուհի Անտոանետա Ստեֆանովային եւ նրա հետ միասին 2,0-ական միավորով բաժանում է 5-6-րդ հորիզոնականները: Իսկ մրցաշարային աղյուսակը 3,0-ական միավորով գլխավորում են Սուտովսկին եւ Բակրոն:
Հինգերորդ տուրում Գաբրիել Սարգսյանը սպիտակներով խաղալու էր Անգլիայի ներկայացուցիչ Դեւիդ Հաուելի հետ:
