Հոկտեմբերի 1-8-ը Երեւանում կկայանա «ՀայՖեստ» 7-րդ միջազգային թատերական փառատոնը: Այս մասին երեկ լրագրողներին տեղեկացրեց փառատոնի նախագահ Արթուր Ղուկասյանը: Նա նշեց, որ եթե նախորդ տարի 62 թատերական խումբ էր ժամանել 33 երկրից, ապա այս տարի 22 երկրից ընդամենը 33-ն է: Պատճառը համաշխարհային տնտեսական ճգնաժամն է: «Բարեբախտաբար, թո՛ւ-թո՛ւ-թո՛ւ, Հայաստանի մշակույթի նախարարությունը տրամադրել է 35 միլիոն դրամ»,- ասաց բանախոսը՝ հավելելով, որ չի ստացել Երեւանի քաղաքապետարանի աջակցությունը:
Փառատոնն իրենց մասնակցությամբ կպատվեն համաշխարհային մեծության այնպիսի թատրոններ, որոնց թվում են Ֆիլիպ Ժանտիի թատրոնը՝ Ֆրանսիայից, «Կրեդո» թատրոնը՝ Բուլղարիայից: Վերջինիս՝ ըստ Գոգոլի գործի արված «Շինելը» բեմադրությամբ էլ կբացվի «ՀայՖեստը»:
Փառատոնի շրջանակներում նախատեսված են նաեւ վարպետության դասեր, սեմինարներ՝ «Բեմանկարչության զարգացումը Հարավային Կովկասում եւ Կենտրոնական Ասիայում» խորագրով:
Փառատոնի նախագահը փաստեց, որ այս տարի ակտիվացել են հատկապես հայկական թատերախմբերը, իսկ Մնջախաղի թատրոնը, ի տարբերություն նախորդ տարիների, չի մասնակցի փառատոնին: «Թե ինչո՞ւ՝ հարցրեք պարոն Դադասյանին», լրագրողների հետաքրքրությանն ի պատասխան՝ ասաց Արթուր Ղուկասյանը, հարցը վերահասցեագրելով Մնջախաղի թատրոնի ղեկավարին:
