Շախմատն ամառայի՞ն մարզաձեւ է, թե՞ ձմեռային: Թերեւս՝ երկուսն էլ
![\"\"](\"https://www.aravot.am/2009/aravot_arm/September/19/p17.jpg\")
Հավանաբար, միջազգային օլիմպիական կոմիտեն այդպես էլ չկողմնորոշվելու պատճառով է, որ այս հրաշք մարզաձեւը չի կարողանում ընդգրկել դրանցից մեկի հիմնական ծրագիր: Բայց վերջին հաշվով դա ՄՕԿ-ի խնդիրն է: Շախմատը եղել եւ մնում է աշխարհի ամենասիրված ու մասսայական մարզաձեւերից մեկը ու իր հեղինակությամբ ամենեւին էլ չի զիջում ուրիշ ոչ մի մարզաձեւի, այդ թվում, ասենք, ֆուտբոլին:
Շախմատային ամենաբարձր կարգի մրցաշարերը, որոնց մեջ մտնում են ինչպես պաշտոնական մրցումները, այնպես էլ՝ միջազգային մրցաշարերը, կլոր տարի հաջորդում են միմյանց: Դրանց մասնակցում են մարզաձեւի ամենավառ ներկայացուցիչները, որոնք, իրավամբ, նաեւ համաշխարհային սպորտի առաջին մեծության գերաստղեր են: Եվ ուրախալի է, որ դրանց մշտապես մասնակցելու հրավիրվում են Հայաստանի թիմերն ու անհատ շախմատիստները, ինչը նախ եւ առաջ արժանիքների գնահատման արդյունք է: Ստացվել է այնպես, որ ակնարկվող մրցաշարերի՝ այդ թվում նաեւ պաշտոնական, մեծ մասը, որպես կանոն, բաժին է հասնում աշնանը:
Հոկտեմբերի 3-ին Մակեդոնիայի Օհրիդ քաղաքում մեկնարկելու է Եվրոպայի ակումբային գավաթի խաղարկությունը, որտեղ հանդես են գալու նաեւ Երեւանի «Միկայի» տղաների եւ աղջիկների թիմերը: Մրցաշարն ավարտվելու է հոկտեմբերի 10-ին: Պատվավոր մրցանակի համար պայքարելու են.
Տղաներ՝
Լեւոն Արոնյան, Վլադիմիր Հակոբյան, Գաբրիել Սարգսյան, Արման Փաշիկյան, Տիգրան Պետրոսյան, Զավեն Անդրիասյան:
Աղջիկներ՝
Էլինա Դանիելյան, Հարիկա Դրոնովալի (Հնդկաստան), Նինո Խուրցիձե (Վրաստան), Լիլիթ Գալոյան:
Եվրագավաթների խաղարկությունից հետո մեր տղամարդկանց հավաքականն ամենայն հավանականությամբ կմնա Օհրիդում եւ հոկտեմբերի 21-30-ը կմասնակցի Եվրոպայի թիմային 17-րդ առաջնությանը: Իսկ ահա աղջիկները կմեկնեն Նովի Սադ: Այնտեղ նույն մրցաշարի կանանց պայքարում մեր թիմում որոշակի փոփոխություններ են նախատեսվում: Դրոնովալիի եւ Խուրցիձեի փոխարեն թիմին կմիանան Լիլիթ Մկրտչյանը, Նելլի Աղինյանը եւ Սիրանուշ Անդրիասյանը:
