![\"\"](\"https://www.aravot.am/2009/aravot_arm/September/18/p15.jpg\")
1984 թվականի սեպտեմբերին Մոսկվայի միությունների տան սյունազարդ դահլիճում սկսվեց շախմատի աշխարհի 12-րդ չեմպիոն Անատոլի Կարպովի եւ հավակնորդ, այնուհետեւ 13-րդ թագակիր Գարրի Կասպարովի շախմատային դիմակայությունը, որը շարունակվեց երկար տարիներ: Նրանց սպորտային հակամարտությունը շուտով վերածվեց քաղաքականի, այնուհետեւ՝ անձնականի: Եվ այն ժամանակ ոչ ոք չէր ուզում զիջել ինչպես խաղատախտակի, այնպես էլ կյանքում՝ միմյանց ամեն գնով սեւացնելու ու վատաբանելու հարցում:
Բայց ժամանակն ամեն ինչ աստիճանաբար դնում է իր տեղը, իսկ տարիքը՝ հարկադրում վերաիմաստավորել անցյալը:
Այսօր շախմատի պատմության երկու երեւելիները որոշել են իրենց միջեւ ծայր առած պայքարի հոբելյանը նշել կրկին խաղատախտակի առջեւ նստելով: Դա ավելի շատ ցուցադրական պայքար է լինելու, այլ ոչ թե մարզական: Նրանք խաղալու են արագ շախմատ, թեեւ այն տարիներին պայքարում էին դասական շախմատում:
Պայմանավորվածության համաձայն, Կասպարովն ու Կարպովը խաղալու են այն բոլոր երկրներում, որտեղ ժամանակին վիճարկել են աշխարհի թագը: Դրանք են Ռուսաստանը, Ֆրանսիան, Իսպանիան, Անգլիան եւ ԱՄՆ-ը:
