Իսրայելի պաշտպանության նախկին նախարար Էֆրաիմ Սնեն կարծիք է հայտնել, որ այդ երկիրը ստիպված կլինի հարվածել Իրանին, եթե Միացյալ Նահանգներին չհաջողվի իրանական միջուկային ծրագրի հետ կապված նոր պատժամիջոցներ մտցնել: Նախկին նախարարի ասելով, եթե ԱՄՆ-ն այդպիսի պատժամիջոցներ չկիրառի, Իսրայելը կհայտնվի անկյունում եւ որեւէ այլ տարբերակ չի ունենա, քան՝ «միջոցներ ձեռնարկել»: Ի պատասխան ճշտող հարցին, Սնեն պարզաբանել է, որ խոսքը «ռազմական գործողությունների» մասին է: Սնեն միաժամանակ կարծիք է հայտնել, թե միջուկային Իրանի գոյությունը Իսրայելի համար անընդունելի է բազմաթիվ պատճառներով, որոնցից մեկն էլ այն է, որ «միջուկային» Իրանը ողջ մերձավորարեւելյան երկրներում կաջակցի ծայրահեղականներին, կսպառնա Իսրայելին: Եվ, վերջապես, արաբական աշխարհում Իրանի հակառակորդները՝ Եգիպտոսն ու Սաուդյան Արաբիան, իրենց հերթին ձեռնամուխ կլինեն սեփական միջուկային զենքի ստեղծմանը: Նախկին նախարարն ասել է նաեւ, թե ներկայիս տնտեսական վիճակը «ոսկե հնարավորություն» է Իրանի վրա տնտեսական ճնշումներ գործադրելու համար:
