Վրաստանի քաղաքացիները այլեւս չեն կարող Ռուսաստանի տարածք մտնել ռուս-ադրբեջանական ցամաքային սահմանով: Այդ սահմանով անցնել թույլատրվում է միայն ԱՊՀ անդամ երկրների քաղաքացիներին: Ռուսական ԶԼՄ-ների մատուցմամբ, երեկ այդ մասին հայտարարել է ՌԴ արտգործնախարարությունը: Հիշեցնենք, որ Վրաստանը 2009թ. օգոստոսի 18-ին դուրս է եկել ԱՊՀ կազմից: Ինչպես փոխանցել է ՌԴ արտաքին քաղաքականության գերատեսչությունը, Թբիլիսիում Շվեյցարիայի դեսպանատանը կից Ռուսաստանի ներկայացուցիչը տեղեկացրել է Վրաստանի քաղաքացիներին ռուսական վիզաներ ստանալու հաստատված կարգի մասին: ՌԴ ԱԳՆ-ում բացատրել են, որ ռուսական կողմը Վրաստանի քաղաքացիների նկատմամբ չի կիրառել եւ չի կիրառում որեւէ հատուկ սահմանափակում. «Խոսքը իրավական անխուսափելի այն խնդիրների մասին է, որոնք առաջացել են ԱՊՀ-ից Վրաստանի դուրս գալու արդյունքում»:
