Հարավային Օսեթիայի գլխավոր դատախազությունը հետաքննություն է սկսել այդ հանրապետության Պետական համալսարանի գրադարանի գրքերն այրելու փաստի առնչությամբ: «Ինտերֆաքսի» փոխանցմամբ, հանրապետության գլխավոր դատախազի տեղակալ Էլդար Կոկոեւն ասել է, որ եթե անօրինական գործողությունների մասին այս տեղեկությունը հաստատվի, ապա ՌԴ Քրեական օրենսգրքի 160 հոդվածի հատկանիշներով՝ ուրիշի գույքը ոչնչացնելը, քրեական գործ կհարուցվի: Հիշեցնենք, որ Հարավային Օսեթիայում հարյուրավոր գրքեր այրելու մասին տեղեկությունները տարածվել էին երեքշաբթի օրը: Ասվում էր, որ գրքերն այրել են, որպեսզի տեղ ազատվի Ռուսաստանից որպես նվեր ուղարկված գրքերի համար: Ականատեսների ասելով, գրքերը համալսարանից մինչեւ հանրակացարան տեղափոխվել էին ռազմական բեռնատարներով եւ նետել ուղիղ կրակի մեջ: Տեղի ունեցածից անմիջապես հետո ԶԼՄ-ներում հայտնվել էին հանցագործությունը փաստող բազմաթիվ հրապարակումներ եւ լուսանկարներ, բայց համալսարանի ղեկավարությունը շարունակում է հերքել տեղի ունեցած փաստը: Որոշ տվյալներով՝ այրված գրքերի մեծ մասը վրացական է եղել: Նախօրեին Վրաստանի ԱԳՆ-ն տեղի ունեցածը բարբարոսություն է որակել:
