Սպիտակ տունը որոշել է հետաձգել Լեհաստանում եւ Չեխիայում հակահրթիռային պաշտպանության համակարգեր տեղակայելու՝ դեռ նախորդ վարչակարգի օրոք նախատեսված եւ Մոսկվային գրգռած ծրագրի իրականացումը: BBC-ի փոխանցմամբ, երեկ այդ մասին հայտարարել է ամերիկյան կառավարության ներկայացուցիչը:
Վերլուծաբանների կարծիքով, այս որոշումը կարող է հարթել Մոսկվայի եւ Վաշինգտոնի հարաբերությունները: Հիշեցնենք, որ Կրեմլը առարկություններ էր ներկայացրել իր սահմանից ոչ հեռու հակահրթիռային «վահանի» ստեղծման դեմ, համարելով, որ այն սպառնալիք է Ռուսաստանի ազգային անվտանգության համար, իսկ Վաշինգտոնը հավաստիացնում էր, որ դա արվում է իրանական հրթիռները չեզոքացնելու նպատակով:
Աղբյուրի փոխանցմամբ, Սպիտակ տունը հետաձգել է այդ ծրագրի իրագործումը, որովհետեւ «համոզվել է, որ Իրանը շատ առաջ չի գնացել միջմայրցամաքային հրթիռների ստեղծման գործում, ինչպես ակնկալվում էր, իսկ Միացյալ Նահանգների եւ եվրոպական մայրաքաղաքների վրա հարձակումների սպառնալիքն էլ ամենեւին մեծ չէ»:
Լեհաստանի պաշտպանության նախարարության ներկայացուցիչը ամերիկյան CNN-ին այս առնչությամբ տված հարցազրույցում հայտարարել է, որ Վաշինգտոնի այդ քայլը «աղետ եւ դավաճանություն է»:
