Սեպտեմբերի 15-ին Աշտարակում բացվել է «Հայաստանի եվրոպական քոլեջ» հիմնադրամի բաժանմունքը: Ըստ Հայաստանում Եվրոպական տարածաշրջանային ակադեմիայի ռեկտոր Անդրանիկ Ավետիսյանի՝ նման կրթօջախներ կան հանրապետության գրեթե բոլոր մարզերում, իսկ Գյումրի, Վանաձոր եւ Գավառ քաղաքներում գործում են Եվրոպական ակադեմիայի մասնաճյուղեր: Սկզբում մտադրություն է եղել Աշտարակում բացել հենց ակադեմիայի մասնաճյուղ, սակայն ժամանակի սղության պատճառով բավարարվել են միայն քոլեջի ստեղծմամբ: Այս պահին լուծված է քոլեջի շենքի հարցը. այն վերանորոգվել ու կահավորվել է եվրոպական չափանիշներով: Առաջիկայում բոլոր լսարաններում կտեղադրվեն համակարգիչներ: Քոլեջում սովորում է Աշտարակի եւ հարեւան բնակավայրերի 51 երեխա՝ մենեջմենթ եւ հաշվապահական աուդիտ մասնագիտություններով: Աշտարակում վերջին տասը տարվա ընթացքում բացվել ու փակվել է մի քանի համալսարան: Այժմ քաղաքում, բացի դպրոցներից, գործում է մեկ ուսումնարան:
