Սուխում-աբխազական պատրիարքարանի կառավարիչի պարտականությունները կատարող Վիսսարիոնը հայտարարել է վրացական ուղղափառ եկեղեցուց անջատվելու վերաբերյալ պատրիարքարանի հոգեւոր սպասավորների ընդունած որոշման մասին: «Lenta.ru»-ի մատուցմամբ, Վիսսարիոնն ասել է, թե 2008թ. օգոստոսի զինված հակամարտությունից եւ Ռուսաստանի կողմից Աբխազիայի եւ Հարավային Օսեթիայի անկախությունը ճանաչելուց հետո աբխազ հոգեւորականները բազմաթիվ անգամ դիմել են Մոսկվայի պատրիարքարան՝ խնդրելով աբխազ ուղղափառներին ընդունել իրենց կառավարման ներքո, սակայն վերջինը մերժել է այդ կոչերը:
Աբխազական եկեղեցին մտադիր է նախկինի պես աջակցություն ակնկալել ռուսական ուղղափառ եկեղեցուց, թեեւ վերջինը տվյալ պահին վրացական դիրքորոշման կողմնակիցն է:
Երեկ Վրաստանի պատրիարքարանը հայտարարել է, թե չի ճանաչում աբխազական ուղղափառ եկեղեցին եւ այն համարում է ինքնահռչակ:
