Մեդվեդեւի վարկանիշն էլ «այնպես՝ ոչինչ է»

«Reuters» գործակալության փոխանցմամբ, օրերս ՌԴ նախագահ Դմիտրի Մեդվեդեւը շատ նրբորեն ակնարկել է 2012թ.-ին ՌԴ նախագահի ընտրությունների ժամանակ վարչապետ Վլադիմիր Պուտինի հետ մրցակցության մեջ մտնելու իր պատրաստակամության մասին:

Մեդվեդեւն այդպիսի հայտարարություն է արել երեքշաբթի օրը՝ արեւմտյան վերլուծաբանների հետ հանդիպման ժամանակ, որտեղ հանդես է եկել Ռուսաստանում սպասվող բարեփոխումների մասին ծրագրային ճառով: Նա իր վարկանիշը համեմատել է Պուտինի վարկանիշի հետ՝ ասելով. «Իմ վարկանիշն էլ այնպես՝ ոչինչ է, եւ մենք պետք է դրա մասին մտածենք»: Մեդվեդեւը միաժամանակ հավաստիացրել է, որ այդ հարցում ինքը կխորհրդակցի իր 57-ամյա գործընկերոջ հետ՝ վստահեցնելով, որ ընտրողները, «ինչպես միշտ, կպաշտպանեն իր ընտրությունը»:

Հիշեցնենք, որ անցյալ շաբաթ վարչապետ Պուտինը «Վալդայան ակումբի» անդամների հետ հանդիպման ժամանակ չէր բացառել նախագահի պաշտոնին վերադառնալու հնարավորությունը՝ ասելով, թե ինքը այդպիսի որոշում ընդունելուց առաջ կխորհրդակցի Մեդվեդեւի հետ, որը ՌԴ նախագահի պաշտոնում 2008թ.-ին ընտրվել է իր երաշխավորությամբ: Այդ հանդիպումից օրեր անց լրագրողները փորձել էին Մեդվեդեւից անձամբ ստանալ մեկնաբանություն Պուտինի հայտարարության առնչությամբ: «Կարթագենը պետք է կործանվի, նշանակում է, որ պատասխանը պետք է ստացվի… Ես ինձ համար ոչինչ չեմ կանխատեսում, ոչինչ չեմ բացառում»,- ասել է նա: