Լեռնային Ղարաբաղի Հանրապետության արտաքին գործերի նախարարությունը տեղեկացնում է, որ 1500 օրինակով լույս է տեսել Լեռնային Ղարաբաղի Հանրապետության ատլասը:
Լեռնային Ղարաբաղի Հանրապետության կառավարությանն առընթեր Անշարժ գույքի կադաստրի պետական կոմիտեի պատվերով աշխատանքները իրականացրել է Հայաստանի Հանրապետության կառավարությանն առընթեր Անշարժ գույքի կադաստրի պետական կոմիտեի Երկրաբաշխության եւ քարտեզագրության կենտրոնը՝ 2007-2009 թվականներին:
Ատլասը պատմաաշխարհագրական տեսանկյունից ամբողջական պատկերացում է տալիս Լեռնային Ղարաբաղի Հանրապետության մասին: Ատլասում ամփոփված է միջին եւ խոշոր մասշտաբների շուրջ 70 քարտեզ, տեքստեր, սխեմաներ եւ բազմակողմանի տեղեկատվություն՝ ԼՂՀ կազմավորման, աշխարհագրական դիրքի, բնական պայմանների եւ ռեսուրսների, բնակչության, տնտեսության եւ մշակույթի մասին: Ներկայացված են նաեւ Արցախի հայերի պատմական զարգացման մեջ էական դեր ունեցած աշխարհաքաղաքական եւ ռազմաքաղաքական իրադարձություններ:
