Ինչպես տեղեկացնում է «Արմինֆո» գործակալությունը՝ երեկ ՀՀ խորհրդարանն առաջին ընթերցմամբ լրացումներ կատարեց «Գիտական եւ գիտա-տեխնիկական գործունեության մասին» օրենքում:
ՀՀ կրթության եւ գիտության նախարար Արմեն Աշոտյանի խոսքերով, օրինագծով կարգավորվում է ՀՀ Գիտությունների ակադեմիայի կողմից ակադեմիկոսներին եւ թղթակից-անդամներին վճարվող պրեմիաների վճարման գործընթացը: Այսօր ակնհայտ է, որ որոշ հայ գիտնականներ լքել են երկրի սահմանները, եւ նրանց պրեմիաների հարցը հետագայում պետք է լուծվի դատական կարգով: Արդյունքում, պետությունը բավական մեծ միջոցներ է վճարում անձանց, որոնք Հայաստանում վաղուց չեն աշխատում: Ներկայացված օրինագծով կարգավորվում են այս խնդրի հետ կապված մոտեցումները: Մասնավորապես, փաստաթղթով նախատեսված է, որ պրեմիաները կվճարվեն այն անձանց, ովքեր իրենց գործունեությունն իրականացնում են Հայաստանում կամ գտնվում են արտասահմանյան կարճաժամկետ գործուղման մեջ: Օրինագծով սահմանվում է, որ այդ գիտնականների՝ հայրենիք տեղափոխվելու դեպքում երեք ամսվա ընթացքում նրանց համար պրեմիաները կվերականգնվեն:
