«Իրանը միջուկային զենք ստեղծելու որեւէ հավակնություն չունի»,- Ynet-ին տված հարցազրույցում ասել է Իրանի Իսլամական Հանրապետության պաշտպանության նորանշանակ նախարար Ահմադ Վահիդին: «Զանգվածային ոչնչացման զենք արտադրելու փաստն անգամ չի համապատասխանում մեր կրոնին, մարդկային ու ազգային սկզբունքներին եւ այն մեր երկրի օրակարգում չէ»,- ասել է Իրանի պաշտպանության նախարարը:
Հիշեցնենք, որ Իրանի եւ «վեցյակի» բանակցությունները իրանական միջուկային խնդիրների շուրջ՝ սկսվելու են հոկտեմբերի 1-ին: Բանակցությունների օրը համաձայնեցվել էր ԵՄ արտաքին քաղաքականության հանձնակատար Խավիեր Սոլանայի եւ Իրանի ազգային անվտանգության քարտուղար Սաիդ Ջալալիի կողմից:
Իսկ մինչ այդ, Իրանում շարունակվում են այդ երկրի նախագահական ընտրություններից հետո ծայր առած զանգվածային անկարգությունների մասնակից վեց անձանց, այդ թվում՝ ուսանողական շարժման ակտիվիստ եւ իրավապաշտպան Աբդուլլա Մոմենիի դատավարությունները:
