Նման հավաքների ժամանակ «ադաբրյամսի» տոկոսը շատ բարձր է

ՀՀ նախագահի հրավերով կուսակցությունների ղեկավարների քննարկումների մասին ասում է ՀՅԴ խմբակցության ղեկավար Վահան Հովհաննիսյանը:

Այսօրվանից Հանրապետության հրապարակում՝ կառավարության եւ արտգործնախարարության շենքերի դիմաց, սկսվելու է ՀՅԴ Գերագույն մարմնի հայտարարած նստացույցը եւ հացադուլը, եւ միաժամանակ տեղի է ունենալու ստորագրահավաք: Այս գործողությունների նպատակն է պահանջել հայ-թուրքական նախաստորագրված արձանագրությունների վերանայում: Հացադուլ են հայտարարելու ՀՅԴ 24 ներկայացուցիչներ, այդ թվում՝ ԱԺ պատգամավորներ, ու նրանց նստացույցով միանալու են եւս 50 դաշնակցականներ։

ՀՅԴ բյուրոյի անդամ, ՀՅԴ խմբակցության ղեկավար Վահան Հովհաննիսյանը երեկ «Հայելի» ակումբում ասաց, թե բողոքի գործողություններ իրականացնելու են ոչ միայն վաղը, «այլ նաեւ ամբողջ մնացած 4-5 շաբաթների ընթացքում, որոնք նախատեսված են ներքաղաքական քննարկումների համար՝ կապված հայ-թուրքական հարաբերություններն ուղենշող 2 փաստաթղթերի հետ»: Նա նաեւ անբավարար համարեց այս խնդրի շուրջ ընթացող քննարկումները: «Քննարկում՝ որպես այդպիսին, տեղի չի ունենում, ի տարբերություն Թուրքիայի,- նկատեց պրն Հովհաննիսյանը:- Մեզանում նման գործընթացներ տեղի չեն ունենում՝ հավանաբար այն պարզ պատճառով, որ իշխանության ներկայացուցիչները գիտակցում են, թե որքա՜ն թույլ են իրենց փաստարկներն այս բանավեճի մեջ»:

ՀՅԴ խմբակցության ղեկավարը պնդեց առաջարկը, որ անցկացվեն այս թեմայով խորհրդարանական լսումներ, ինչին դեռեւս չեն արձագանքել կոալիցիայի ներկայացուցիչները: ՀՀ նախագահ Սերժ Սարգսյանը կուսակցությունների նախագահներին սեպտեմբերի 17-ին հրավիրել է քննարկման՝ նվիրված Հայաստան-Թուրքիա հարաբերությունների կարգավորման ներկա փուլին: «Առավոտի» հարցին, թե այս ձեւաչափն արդյոք բավարա՞ր են համարում, թե՞ այնուամենայնիվ պնդում են, որ լսումների տարբերակն առավել արդյունավետ է՝ Վահան Հովհաննիսյանը պատասխանեց. «Ողջունելի կլինի նման հավաքը, բայց, իհարկե, նաեւ բավարար չի լինի, քանի որ հավաքվածների հնարավորություններն ազդելու հասարակական կարծիքի վրա՝ բնական է, հավասար չեն լինելու: Եվ մտահոգիչ է, որ որպես կանոն՝ նման միջոցառումների ժամանակ ադաբրյամսի տոկոսը շատ բարձր է լինում: Մենք ուզում ենք լուրջ, իսկական, շահագրգիռ քննարկում»: Ըստ նրա՝ «Իրականության մեջ բողոքը, դժգոհությունը, մտահոգությունները մեր հասարակությանն ամբողջությամբ չեն հասցվում: Հիմա եթե պետք է կուսակցությունները հավաքվեն, իսկ հետո հեռուստատեսությամբ հնչեն միայն գովասանքները՝ կարծում եմ, դա տեղին չէ: Խորհրդարանական լսումները մի քիչ այլ բնույթի միջոցառում են, քանի որ դրանց արդյունքում կարող է ծնվել ԱԺ որոշման կամ հայտարարության առաջարկ: Եվ վերջապես՝ ԱԺ լսումներն ի վերջո շատ լավ ֆոն են ստեղծում հետագա խորհրդարանական քննարկման համար»:

Ի դեպ, այդ արձանագրություններն ԱԺ-ում վավերացնելու կապակցությամբ երկրորդելով ՀՅԴ բյուրոյի ներկայացուցիչ Հրանտ Մարգարյանի արտահայտած տեսակետը, թե դեմ են նման ձեւով վավերացմանը՝ թող ստորագրողներն իրենք պատասխանատվություն կրեն՝ Վահան Հովհաննիսյանը խնդիրը դիտարկեց նաեւ այլ տեսանկյունից. «Մենք չունենք ուրիշ հնարավորություն մեր հասարակության լայն շրջանակներին բոլոր վտանգները բացատրելու, մատնանշելու: Դրանցից մեկը խորհրդարանական քննարկումն է»: Տեղեկացրեց, որ ՀՅԴ-ն այսօր տարածելու է մի փաստաթուղթ, որտեղ հստակ նշված է, թե «Դաշնակցությունն արձանագրության ո՛ր կետերում ի՛նչ փոփոխություններ է առաջարկում ու պահանջում»: