ՀՀ նախագահ Սերժ Սարգսյանը մտադիր է հայաստանյան քաղաքական կուսակցությունների առաջնորդների մասնակցությամբ քննարկել հայ-թուրքական հարաբերությունների կարգավորման ներկա փուլին առնչվող հարցեր: Հանդիպումը նախատեսված է անցկացնել սեպտեմբերի 17-ին՝ Կ. Դեմիրճյանի անվան մարզահամերգային համալիրում: Հիշեցնենք, որ սպասվող քննարկումն իր ձեւաչափով երրորդն է լինելու: Ավելի վաղ՝ 2008թ. նոյեմբերի 20-ին, նույն վայրում քաղաքական ուժերի ներկայացուցիչներն ու Սերժ Սարգսյանը համատեղ քննարկել էին Լեռնային Ղարաբաղի հիմնախնդրին, իսկ 2009թ. մարտի 20-ին՝ համաշխարհային ֆինանսատնտեսական ճգնաժամին վերաբերող հարցեր:
Երեկ Հայ ազգային կոնգրեսի համակարգող Լեւոն Զուրաբյանը «Առավոտին» փոխանցեց, թե ինչպես նախորդ քննարկումներին, այս մեկին էլ իրենք մասնակցելու մտադրություն չունեն այն նույն պատճառաբանությամբ, ինչ ներկայացվել էր նախորդների դեպքում: Միաժամանակ Լ. Զուրաբյանը ի պատասխան մեր հարցին, չբացառեց սեպտեմբերի 18-ի հանրահավաքից հետո Կոնգրեսին անդամակցող ուժերի եւ համակիրների հետ այս խնդրի առնչությամբ լայն քննարկում ծավալելու հնարավորությունը, թեեւ շեշտեց, որ այսօր էլ այդ հարցը քննարկվում է Կոնգրեսի ներսում՝ նաեւ խորհրդի նիստերի ժամանակ:
