ՀՀ գլխավոր դատախազությունը կարճել է ՀՀՇ Գյումրիի կառույցի ներկայացուցիչ, 2008թ. նախագահի ընտրությունների ժամանակ Լեւոն Տեր-Պետրոսյանի՝ Շիրակի մարզի նախընտրական շտաբի պետ Մուրադ Գրիգորյանի դեմ հարուցված քրեական գործը՝ ապացույցների անբավարարության պատճառով: Մ. Գրիգորյանը մեղադրվում էր ընտրությունների օրը ընտրական հանձնաժողովի աշխատանքներին խոչընդոտելու համար եւ ավելի քան մեկ տարի ընդհատակում մնալուց հետո այս տարվա ամռանը ինքնակամ ներկայացել էր իրավապահ մարմիններին: ՀՔԾ-ն գործի նախաքննությունն ավարտելուց հետո այն ուղարկել էր դատախազություն` մեղադրական եզրակացությունը հաստատելու համար: Սակայն, ինչպես տեղեկացնում է «news.am»-ը, դատախազությունում ապացույցների անբավարարության պատճառով այդ եզրակացությունը չի հաստատվել, եւ գործը կարճվել է:
