Իսպանական Բիլբաո քաղաքում ընթացող շախմատային «Մեծ սաղավարտի» եզրափակիչ մրցաշարի երկրորդ շրջանի առաջին տուրում հայ գրոսմայստեր Լեւոն Արոնյանը պարտության մատնեց Ռուսաստանի ներկայացուցիչ Ալեքսանդր Գրիշչուկին:
Սա Լեւոնի երրորդ անընդմեջ հաղթանակն էր, եւ այժմ նա 9 միավորով միանձնյա գլխավորում է մրցաշարային աղյուսակը: Գրիշչուկը կարողացավ պահպանել երկրորդ հորիզոնականը՝ օգտվելով այն հանգամանքից, որ Կարյակին-Շիրով մրցամարտում ոչ-ոքի է արձանագրվել: Նա իր ակտիվում 6 միավոր ունի:
Սերգեյ Կարյակինը 5 միավորով հաստատվել է երրորդ հորիզոնականում, իսկ վերջին տեղը 2 միավորով զբաղեցնում է Ալեքսեյ Շիրովը: 5-րդ տուրում Լեւոն Արոնյանը սպիտակներով կխաղա Շիրովի, իսկ Գրիշչուկը՝ Կարյակինի հետ:
