![\"\"](\"https://www.aravot.am/2009/aravot_arm/September/12/p4.jpg\")
Մոլդովայի գործող նախագահ Վլադիմիր Վորոնինը երեկ պաշտոնապես հայտարարել է իր հրաժարականի մասին: «Ես երկրի կառավարությունը նոր իշխանություններին եմ հանձնում՝ ծանր սրտով: Այժմ իմ համախոհների եւ զինակիցների ողջ թիմը, որը մենք ձեւավորել էինք անցած 8 տարիների ընթացքում, ինձ հետ միասին կանցնի ընդդիմադիր դաշտ»,- երեկ առավոտյան երկրի քաղաքացիներին ուղղած իր ուղերձում հայտարարել է կոմունիստ Վորոնինը: Նրա հրաժարականով Եվրոպայում այլեւս որեւէ երկիր չմնաց, որտեղ կառավարում են կոմունիստները:
Նա մատնանշել է այն հաջողությունները, որոնց հասել է Մոլդովան կոմունիստների իշխանության օրոք եւ շեշտել, որ չի հանդուրժի այն ճանապարհը, որով նոր իշխանությունը փորձում է տանել երկիրը: «Ես չեմ հավատում, որ քաղաքական գործիչները, որոնք միավորվել են բացառապես մերժողականության էմոցիայի եւ սեփական երկիրը լիովին սեւացնելու, պաշտոններ բաժանելու շուրջ, ընդունակ են հասարակությանը պոզիտիվ ծրագիր առաջարկել»,- հայտարարել է Վորոնինը: Մոլդովայի Սահմանադրության համաձայն, այն դեպքում, երբ երկրի նախագահը հրաժարական է տալիս՝ պետության ղեկավարի պարտականությունները կատարում է խորհրդարանի նախագահը: Այսպիսով, Մոլդովայի նախագահի պաշտոնակատար է դարձել այդ երկրի օրենսդիր մարմնի ղեկավար Միխայ Գիմպուն:
