Ֆրանսահայ թատերական գործիչ, ռեժիսոր, բեմադրիչ Ժիրայր Բաբազյանը ժամանել է Երեւան: Այցի շրջանակներում նրան կհանձնվի «Մովսես Խորենացի» շքանշան՝ հայկական թատրոնը, գրականությունն ու օպերան միջազգային բեմեր հանելու եւ հանդիսատեսի ջերմ ընդունելությանն արժանացնելու համար: Ժիրայր Բաբազյանն արտասահմանյան հանդիսատեսին ներկայացրել է հայկական մշակույթի այնպիսի գործեր, ինչպիսիք են «Արարատյան կայան», «Անուշ», «Արշակ 2-րդ», «Ատամնաբույժն արեւելյան» եւ այլն։ Ժ. Բաբազյանը Թատերական միության նախագահ Հակոբ Ղազանչյանի հրավերով Երեւանում կներկայացնի Իրինա Բրուկի թատերախումբը, որի հիմնադիր անդամներից է։ 2005-ից ի վեր թատերական հյուրախաղերով Իրինա Բրուկի թատերախումբը շրջագայել է Ֆրանսիայում, Շվեյցարիայում, Բելգիայում, Մարոկկոյում, Հունաստանում, Իտալիայում, Գերմանիայում, Կանադայում, Իսպանիայում։ Վայելելով Իրինա Բրուկի հոգատար վերաբերմունքը՝ Ժիրայր Բաբազյանը խաղացել է Շեքսպիրի Midsummer dream՝ «Ամառային գիշերվա երազ» կատակերգությունում: Այն սեպտեմբերի 18-ին կներկայացվի Հ.Պարոնյանի անվան կոմեդիայի պետական թատրոնում՝ հայերեն թարգմանությամբ: Նույն թատրոնում սեպտեմբերի 20-ին Ժիրայր Բաբազյանը կներկայացնի «Դոն Կիշոտը»՝ նույնպես հայերեն (սինխրոն) թարգմանությամբ:
