Իտալիայի Ֆերմո քաղաքում պատանի շախմատիստները շարունակում են պայքարել Եվրոպայի առաջնությունում:
Խաղացված վեց տուրից հետո մեր տղաները բոլոր տարիքային խմբերում չեմպիոն կամ մեդալակիր դառնալու լավ հնարավորություններ են պահպանում:
10 տարեկանների մեջ Միքայել Մկրտչյանը 5,5 միավորով միանձնյա գլխավորում է մրցաշարային աղյուսակը: Արման Պողոսյանը նրանից ետ է մնում մեկ միավորով (8-րդ տեղ) եւ հավակնում է մրցանակային տեղի:
18-ամյա Սամվել Տեր-Սահակյանը 5,0 միավորով բաժանում է 1-6-րդ հորիզոնականները, իսկ նրանցից կես միավոր պակաս վաստակած Հայկ Վարդանյանն առայժմ 13-րդն է:
12 տարեկանների մեջ Մանվել Պետրոսյանը եւ Տիգրան Հարությունյանն իրենց անվան դիմաց գրանցել են 4,5-ական միավոր եւ առաջատարից ետ են մնում մեկ միավորով:
Մեկ հաջող խաղը մեդալակիր դառնալու հեռանկարներ կարող է բացել 4,5-ական միավոր վաստակած 16 տարեկաններ Վահե Բաղդասարյանի (4-րդ տեղ) եւ Ռոբերտ Աղասարյանի (9-րդ) առջեւ:
Ավաղ, նույնատիպ հույսեր այլեւս չունենք մեր աղջնակների պարագայում, որոնք այս պահին տեղեր են զբաղեցնում մրցաշարային աղյուսակների միջին եւ ստորին հորիզոնականներում:
Միակ բանը, որ կարելի է ասել, այն է, որ այս առաջնությունը նրանց համար միջազգային մրցումներին մասնակցելու փորձի անհրաժեշտ ձեռքբերում է:
