Ուկրաինայի նախագահ Վիկտոր Յուշչենկոն երեկ հայտարարել է, որ երկրի խորհրդարանը կարող է ինքնալուծարվել: ԼՁԸՀ-ՁԸհհ-ի փոխանցմամբ, նման հայտարարություն նա արել էր «Ինտեր» հեռուստաընկերությանը տված հարցազրույցի ժամանակ: «Քանի որ չաշխատող խորհրդարանը շոու է, որը թանկ արժե Ուկրաինայի համար, այն կարող է ինքնալուծարվել: Այդ դեպքում մինչեւ նախագահական ընտրությունները մենք կունենանք կենսունակ գերագույն օրենսդիր մարմին»,- շեշտել է Յուշչենկոն: Ընդսմին, նա հավելել է, որ նախագահը հիմքեր չունի Գերագույն ռադան ցրելու համար: Ինքնալուծարման գաղափարով հանդես է եկել խորհրդարանի նախագահ Վլադիմիր Լիտվինը: Աղբյուրի մատուցմամբ, դիտորդներն արձանագրում են, որ Յուշչենկոն արդեն սկսել է 2010թ. հունվարի 17-ին կայանալիք նախագահական ընտրությունների իր քարոզարշավը: Նրա քարոզարշավի առանցքը լինելու է հակառուսական ուղղվածությունը եւ վարչապետ Յուլիա Տիմոշենկոյի հետ հակադրությունը:
Գերմանական «Շպիգել» թերթին տված հարցազրույցում Ուկրաինայի նախագահը Ռուսաստանին մեղադրել է Ղրիմում իրավիճակը՝ Սեւծովյան նավատորմի ներկայության հետ կապված հարցերի շահարկմամբ ապակայունացնելու մեջ: «Անփութությունն ու անօրինականությունը, որը տիրում է ռուսական սեւծովյան նավատորմում, արդեն հանգեցրել են ուկրաինական իրավապահների հետ կոնֆլիկտների»,- հայտարարել է Յուշչենկոն: Նրա ասելով, Ուկրաինան իրեն իրավունք է վերապահում վերահսկել Ռուսաստանի ռազմական ներկայությունը: Յուշչենկոյի կարծիքով, Մոսկվայի ազդեցությունը Ուկրաինայի վրա կարող է հանգեցնել ուկրաինացիների կողմից ժողովրդավարության հիմնական արժեքների կորստին: «Կիեւը ձգտելու է ապահովել իր անվտանգությունը՝ ՆԱՏՕ-ի հետ սերտ համագործակցության հաշվին»,- այդ համատեքստում հայտարարել է Ուկրաինայի նախագահը:
