Սեպտեմբերի 11-ին «Կարեն Դեմիրճյան» մարզահամերգային համալիրում մեկնարկում է ձյուդոյի Եվրոպայի երիտասարդական առաջնությունը: Այս մարզաձեւից նման մակարդակի մրցում Հայաստանում առաջին անգամ է անցկացվում:
Հայաստանի ձյուդոյի ֆեդերացիայի նախագահ Ալեքսան Ավետիսյանը մրցումների նախաշեմին պատասխանեց «Առավոտին» հետաքրքրող հարցերին:
– Ինչպես ասում են, օր գրեթե չի մնացել: Բոլո՞ր խնդիրներն են լուծված:
– Նախապատրաստական աշխատանքների առյուծի բաժինը կատարված է, եւ հիմա մենք դրանց ավարտական փուլում ենք: Մինչեւ առաջնության մեկնարկը՝ բոլոր խնդիրները կարգավորված կլինեն: Ինչ հարց հընթացս առաջանում է, անմիջապես նախարարների մակարդակով լուծվում է առաջնության անցկացման կառավարական կազմկոմիտեում:
– Ավելի կոնկրետ խոսենք՝ մարզադահլիճի ամբողջական պատրաստվածություն, տատամիներ, տեխնիկական սպասարկում, հեռարձակում, մամուլի կենտրոն, այլեւայլ սարքավորումներ, հանդերձարաններ եւ հազար ու մի այլ հարցեր, որոնցից ոչ մեկը ձյուդոյի եվրոպական միության համար մանրուք չէ:
– Բոլոր խնդիրները, արդեն ասացի, հիմնականում լուծված են: Իսկ ինչ դեռ պակասում է, մնացած օրերին կլուծվի: Համենայնդեպս, կառավարական կազմկոմիտեի անդամ բոլոր նախարարներն էլ դա վստահեցնում են: Այնպես որ, մինչեւ բացման օրը խնդիր չի լինի:
– Մենք խոսեցինք միայն ՄՀՀ-ում ստեղծված պայմանների մասին: Պակաս կարեւոր չեն նաեւ հյուրանոցների, տրանսպորտի, մարզումային դահլիճների, մասնակիցների անվտանգության եւ նմանատիպ մյուս հարցերը:
– Այստեղ էլ ամեն բան հաշվի է առնված: Սկսած դիմավորումից, մինչեւ ճանապարհում: Ամեն բան կազմակերպված է միջազգային չափորոշիչների պահանջներին համապատասխան:
– Քանի՞ երկիր է մասնակցության հայտ ներկայացրել:
– Ինչպես նախապես էինք հայտարարել՝ 40:
– Դա վերջնակա՞ն թիվ է:
– Հայտերի ներկայացման վերջնաժամկետը օգոստոսի վերջին օրն էր: Հնարավոր է, որ երկրների կամ մասնակիցների թվի նոր փոփոխություններ դեռ լինեն: Նման բաներ երբեմն պատահում են:
– Առաջնության մասնակիցներին եւ հյուրերին քանի՞ հյուրանոց է տրամադրվել:
– Վեց: Սակայն կենտրոնը «Անի Պլազան» է, որտեղ անցկացվելու է վիճակահանությունը, հրավիրվելու է մրցավարական նիստը եւ այլն:
– Ադրբեջանի հավաքականը հաստատ գալո՞ւ է:
– Այո: Այդ նպատակով մեկ օր առաջ Երեւան էին ժամանել Ադրբեջանի սպորտի եւ սոցապ նախարարները: Երկրորդը նաեւ նրանց ձյուդոյի ֆեդերացիայի նախագահն է: Նրանց ընդունեց մեր սպորտի եւ երիտասարդության հարցերի նախարար Արմեն Գրիգորյանը:
– Հարցերի ի՞նչ շրջանակ քննարկվեց:
– Հիմնականում՝ պատվիրակության անդամների անվտանգության: Սկսած հյուրանոցից, մինչեւ մրցումներ: Պարոն Գրիգորյանը բոլոր երաշխիքները տվեց:
– Նրանք ե՞րբ են ժամանելու եւ, եթե գաղտնիք չէ, ո՞ր հյուրանոցում են հանգրվանելու:
– Ըստ մեզ ներկայացրած նախնական գրաֆիկի, Ադրբեջանի պատվիրակությունը, ինչպես եւ Իսրայելը, ժամանելու է առաջիններից մեկը՝ սեպտեմբերի 8-ին: Նրանք բնակվելու են «Կոնգրես» հյուրանոցում: Դա իրենց ցանկությունն է, քանի որ այնտեղ է հանգրվանելու նաեւ Թուրքիան:
– Մե՞ծ պատվիրակություն է լինելու:
– Ընդհանուր առմամբ, 15 հոգի՝ հինգ մարզիկ, մարզիչներ, բժիշկ եւ երկու լրագրող:
– Որոշ լրատվամիջոցներ նշում են, որ նախարարների հանդիպման արդյունքում ադրբեջանական կողմի պահանջով ստորագրվել է մի փաստաթուղթ, որը կազմակերպիչ կողմին, այսինքն՝ Հայաստանին, լրացուցիչ պատասխանատվություններ ստանձնել է պարտադրել: Ասենք, չեմպիոն ունենալու դեպքում Ադրբեջանի ազգային դրոշի պարտադիր բարձրացումը, օրհներգի հնչեցումը, ընդհուպ, մինչեւ հանդիսականի պարտադիր ոտքի կանգնելը ու պատշաճ հարգանք դրսեւորելը:
– Ես ինքս էլ մասնակցել եմ այդ հանդիպմանը: Չեմպիոնի կամ մրցանակակրի պատվին օրհներգ հնչեցնելը եւ դրոշ բարձրացնելը պարտադիր է եւ այդ մասին խոսելն էլ՝ անիմաստ: Ինչ վերաբերում է հանդիսականին, ոչ մի երկիր չի կարող հարյուր տոկոսով խոստանալ, որ բոլորը մի մարդու պես ոտքի կանգնեն, մանավանդ, մեր երկրների հարաբերությունների պարագայում: Նույն ադրբեջանցի մարզասերները, արդյոք, Բաքվում չէի՞ն սուլում, էլ չեմ խոսում այլ բաների մասին, երբ ըմբշամարտի աշխարհի առաջնությունում երկու անգամ բարձրացվում էր Հայաստանի պետական դրոշը: Մենք հո դրան ըմբռնումո՞վ մոտեցանք: Այնպես որ, մենք ամենուր ապահովում ենք նրանց անվտանգությունը, ՄՀՀ-ում, մեդալակիր ունենալու դեպքում միջազգայնորեն պահանջվող կարգով բարձրացնում դրոշը, իսկ չեմպիոնի համար նաեւ՝ հնչեցնում օրհներգը: Սա սովորական պրոցեդուրա է: Իսկ ինչ վերաբերում է հայ մարզասերին, հավատում եմ, որ նա իրեն բոլոր առումներով արժանապատիվ կպահի:
